Woordeboek van Afrikaans Vandag

gaslighting s.nw. [geen meervoud] (Engels, psigiatrie en psigoanalise) Ook (selde) gasbeligting
vorm van sielkundige misbruik en manipulasie wat daarop gemik is om iemand aan sy of haar eie oordeel en gesonde verstand te laat twyfel, soos deur vol te hou dat die persoon oor bepaalde dinge, gebeurtenisse, sake verkeerd is, dat die persoon hom of haar misgis, vergis, dat hulle bepaalde dinge vergeet, belangrike dinge nie onthou nie, en so meer, totdat die slagoffer uiteindelik werklik glo dat sy of haar werklikheid nie met die ware werklikheid ooreenstem nie: › Gaslighting is ’n soort belediging wanneer jy iemand se verstandelike helderheid sonder goeie gronde betwyfel
(Rapport, 2 Julie 2023). › Gaslighting is as jy iemand laat voel asof hulle besig is om kêns te raak. Jy stel vir hulle ’n strik en dan dink hulle daar is fout met hulle (Herman Lategan, Hoerkind, 2022). › [Die universiteitsbestuur] probeer wegkom deur daarop te wys dat daar geen klagtes is nie. Hul verdere poging om te impliseer dat die klaers hulself misgis, is ’n klinkklare geval van wat as “gaslighting” bekend staan: Die bestuur impliseer dat die klaers probleme sien wat daar nie is nie, selfs al is daar sterk prima facie-getuienis om ’n ondersoek te gelas (Frederik R. van Dyk, Netwerk24, 9 Maart 2021). › Die term gaslighting word gebruik as iemand emosioneel gemanipuleer word om hul eie geestesgesondheid te bevraagteken (Huisgenoot, 21 Februarie 2020). › Gaslighting: Laat iemand twyfel aan hul eie geestesgesondheid deur die verspreiding van ’n leuen (Barend du Plessis, Rapport, 5 April 2020). › Narsiste is bekend vir die emosionele vorm van geweld genaamd gaslighting. Hierdie taktiek is wat die meeste skade gedoen het in my lewe, soveel so dat ek nie vertroue gehad het in my eie vermoë om besluite te neem of selfs my eie geheue van gebeure nie (Sarie, 25 Februarie 2020).

oorsprong:
Na die stelselmatige, kwaadwillige kognitiewe verstrooiing van die slagoffer deur haar eggenoot in die Amerikaanse rolprent met dié titel, 1944, gebaseer op 'n toneelstuk, Angel Street, deur Patrick Hamilton, 1938.

KYK OOK: gaslight